Nassatat timmisartuutileqatigiiffinnut allanut ingerlateqqinneqartarnerat

Air Greenlandimiit 16. marts 2009 aallarnerfigalugu nassatavit SAS aqqutigalugu Aalborgimut Århusimullu aammalu taakkunanngaanniit ingerlatiinnarneqarsinnaalernissaat neqeroorutigineqarsinnaalerpoq. Maannarpiaq tamanna Århusimut Aalborgimullu aammalu taakkunanngaanniit angallassinernut atuuppoq, aammalu ornigassanut timmisartuutileqatigiiffinnulluunniit allanut tamanna atuutsinneqanngilaq. Air Greenlandimiit unammilligassaq tamanna aaqqinniarneqarluni suli sulissutigineqarpoq.
Nassatanik tunniussinermi Aalborgimut imaluunniit Århusimut taakkunanngaanniillu ingerlaqqittussaanerlutit, angalanissamullu pilersaarut SAS-imut tunngasuunersoq maluginiassavat.

Københavnimut tikikkuit SAS Transfer Center ingerlaannarlutit ilaasussaanerit uppernarsarniarlugu ornissavat, tassanilu nunap iluani ingerlaqqinnissamut ikissutissamik tunineqassaatit. Saaffiginnittarfik aallartussanut immikkoortumi akitsuuteqanngitsunik pisiniarfiup eqqaani inissisimavoq.

Aalborgimut/Århusimut tikikkuit nassatatit tunniunneqassapput.

Aalborgimiit aamma Århusimiit Kalaallit Nunaannut aallaruit Kalaallit Nunaannut ingerlaqqiffissat sumiinnersoq maluginiassavat. Københavnimut tikikkuit Novia Transfer Center toqqaannartumik ornissavat, tassanilu Kalaallit Nunaannut aallarnissamut ikinissannut uppernarsaammik tunineqassaatit. Saaffiginnittarfik aallartussanut immikkoortumi akitsuuteqanngitsunik pisiniarfiup eqqaani inissisimavoq.

Kalaallit Nunaanni uniffissannut tikikkuit nassatatit tunniunneqassapput.

Akisussaaffimmik iperaaneq:

Kinguaattoornermi, aallanngitsoornermi allamilluunniit peqquteqarluni aallartoqanngitsoornerani Air Greenland imaluunniit SAS nassatanik ingerlatitseqqinnissamut pisussaanngilaq.

Nassatat tigummiaannakkat:

Ilaasut tamarmik nassatat tunniunneqartut saniatigut tigummiaannakkamik ataatsimik nassataqarsinnaapput, taannalu annerpaamik 55 x 40 x 23 cm-inik angissuseqassaaq aammalu 8 kg-nik oqimaassuseqassalluni. Nassataq tigummiaannarneqartoq ikiartornermi takutinneqassaaq pisariaqarpallu oqimaalutarneqassalluni.

Isumannaallisaaneq kiisalu nunap iluani angallavinni inissap killeqarnera pissutigalugu nassataq tigummiaannagaq ataasiinnaassaaq. Taamaattorli nioqqutissanik akitsuuteqanngitsunik, nassatatut nalunaaqutsigaanngitsunik nassartoqarsinnaavoq. Nassatat tigummiaannakkat sinneruttut timmisartup lasteqarfianut inissinnissaannut immitsinnut pisinnaatippugut.

Nakorsaatitit nassatannut tigummiaannakkannut ikigukkit ajunnginnerussaaq, taamaalillutit kinguaattoortoqarnerani ajornartorsiulissannginnavit.

Nassatavit tigummiaannagassavit poortunnginneranni imerpalasut tarnutillu nassarneqartarnerinut maleruagassat immikkut ittut maluginiarluaqqussavagut.

Nassatavit tigummiaannakkavit saniatigut nassarsinnaavatit:

• Arnap taskia mikisoq imaluunniit allattaaviit
• Kavaajaq imaluunniit qallersaat
• Assiliivik mikisoq imaluunniit qinngutit
• Tippi
• Angalanermi atuagassat
• Alanngittaat imaluunniit ajaappiaq

Isumannaallisaaneq eqqarsaatigalugu pigisat assigiinngitsut timmisartutsinnut ikininni nassarsinnaanngilatit. Una toorlugu, nassatannut tigummiaannakkannut ikillugit nassarsinnaanngisannut allattuivik ataatsimoortoq nassaarisinnaavat.

Tigummiaannakkannik nassataqarniarnak aalajangeruit, taava uku atuutissapput

Nassatat tunniunneqartut

Ikiartornermi nassatatit uuttortarneqassapput, taakkulu akikinnermi angalaguit annerpaamik 20 kg-nik aammalu akisunermi angalaguit 30 kg-nik oqimaassuseqarsinnaapput. Tigummiaannakkannik nassataqarniarnak aalajangersimaguit aamma taakku atuutissapput. Meeqqat marluk inorlugit ukiullit nassatatut tunniussat 10 kg-t kiisalu aneerussiviit patitittakkat ataatsit akeqanngitsumik nassarsinnaavaat.

Nassatatit apuuffissannut nalunaaqutserneqassapput, aammalu nalunaaqutsiussap assilinera nipitittagaq angalanissamut pilersaarutivit tunuanut nipitinneqassaaq. Nassatannut uppernarsaat nipitittagaq paarilluaruk, nassatatit kukkunikkut kinguaattoortinneqarpata tammarpataluunniit ujarlernermi atorneqartussaammat, tamatumalu saniatigut angalaninnut sillimmasiissutit atorfissaqartilerukku uppernarsaataasussaavoq
Nassatavit poortunnginnerini pigisat suut timmisartumut nassaqqusaannginnersut paasiniaqqullugit qinnuigissavatsigit. Nassatat tigummiaannartakkat assigalugit pigisat ilaat nassatannut tunniunneqartunut ilaatissinnaanngilatit, allattuiffik uani takuuk.

Air Greenland nassatanut aserujasunut asiujasunulluunniit imminut akisussaatissinnaanngilaq. Angalasussat aserujasunik, soorlu nipilersuutinik, aallaasinik qarasaasianilluunniit (laptops) nassarniartut pigisatik assartorneqarnerminni aserorsinnaajunnaarlugit qajannaatsumik poortussavaat.

Oqimaappallaanik nassarneq

Mittarfimmukannginninni nassatavit oqimaassusiinik uuttuinissaq tamatigut iluaqutaasinnaavoq. 20 kg-t aamma 30 kg-t sinnerlugit oqimaassuseqarpata, oqimaappallaarutip kg-anit siullermiit akitsuummik akiliisinneqassaatit. Akitsuut angallaviup ilaaffigisassavit akiata procentianut ataatsimut naatsorsorneqartarpoq, tassalu 2010-mi assersuutigalugu Kangerlussuup Københavnillu akornanni angallavimmi ataatsimi DDK 60-iuvoq, Narsarsuup Københavnillu akornanni angallavimmi ataatsimi DKK 71-iuvoq, Nuup Kangerlussuullu akornanni DKK 32-iuvoq aammalu Qaqortup Narsarsuullu akornanni DKK 12-iulluni.

Nassatatit 75 kg-t sinnerlugit oqimaassuseqartussaappata, aallannginnermi piffissaalluarallartillugu inniminniissaatit. Oqimaappallaanik nassataqarnissamut inniminniineq angalatitsivik angalanissannik inniminniiffigisat aqqutigalugu pissaaq, imaluunniit internettikkut websupport@airgreenland.gl aqqutigalugu angalanissannik innniminniisimaguit taanna aqqutigineqassalluni. Oqimaappallaanik nassataqarnissamut inniminniinermi kg-t amerlassusaat, pigisat amerlassusaat aammalu angissusiat (takissuseq x silissuseq x portussuseq) nalunaarutigissavatit. Timmisartut qulimiguullillu assigiinngitsut pisinnaasaat assigiinngitsuummata, piffissaalluarallartillugu oqimaappallaanik nassataqarnissamik inniminneeqqullutit inassuteqarfigissavatsigit. Oqimaappallaanik nassataqarnissamut inniminniinerit uppernarsaanermut atatillugu akilersinneqassapput.

Oqimaappallaanik nassataqarnissamut inniminniinerit taamaatittariaqalerukku, aallarfissaq pilersaarutaasoq ullut marluk tikillugit sioqqullugit akiliutigisimasatit soorunami utertinneqarsinnaapput, taakkunanngali sullissinermut akitsuut aammalu ullormut pilersaarutaasumik aallarfissamut ataatsimut akitsuut ilanngaatigineqassapput. 75 kg-t inorlugit oqimaappallaanik nassataqarnissaq siumoortumik inniminnerneqarsinnaanngilaq, ajornannginnersorlu aatsaat ullormi aallarfissami nassatanik tunniussinermi uppernarsarneqarsinnaalluni.